Un jorn t'i tornaràs far !

• 'Vetz vergonha perquè parlem un meschent dialècte occitan que sembla lu francès,
• Atz vergonha de n'autres perquè volem pas servar vos miradors ne'n devenir,
• La vergonha que n'autres am la mar a Royan ! È !
• Que sem lus prumiers (aprep los japonès) d'espandir las teorias daus plasers a nòstras amijas las bestias.

L'avenir es pensat per de la gent de las Charentas, subretot lo benaise de las bestiàs coma iò ditz lu chapeu, alaidonc,  la presentacion dau prumier juec sexuau per los chins (*). 'Queu juec es fabricat a Mòrnac (pròpche d'Eigolesme) per l'usina Rotodesign e es estat dessenhat per dos frairs de l'agença Feeladdicted. Iò sabe, Mòrnac es dins l'anciana-partida-occitana-qu'es-pus-occitana-desempuèi-lu-XVèma-segle mas bon, l'economià 'quò compta maitot dins un país, podem pas tots surtir de las tèsas o b'etot daus lexics, e m'es 'vís que iò un merchat.

« D'un certan punt de vuda, 'quò sembla 'na catisson gonflabla per los chins » se 'musa Monsur Delimoges, lu director de l'usina (**).

« Hot doll » podriá passar per un chause « design » per causa de sas fòrmas rondas, de sas colors, mas, 'la es livrada coma 'na natura de plastic e 'na notiça !
400 euròs per un juec que totjorn a lu cuòu en jardòla, per 'na tela inovacion semble pas de tròp per l'esportacion vers lu Japon, l'Espanha e Israël...

Ne'n mai d'aquò, 'queu juec es realisat dins un plastic 100% reciclable, 'la es pas bela la vita. Per lu moment i a doas colors solament, blanc o neir, e 'na talha maitot. Mas los chins de bargiers, los dalmacians e autres grands chins deven pas desesperar, las grandas talhas 'riban bentòst...

*lu plaser de la fumela es totjorn ne'n esploracion dins la testa daus charchors.
** los noms son pas estats chamjats

• Lu sit per lu 'chaptar
• De legir dins la ciber-premsa e sus 'queu joèb ente i a mantunas fotografias dau Kiki tot nud.
  

L'Estre balha de las possibilitats,
'quò es per lu non-estre que son usadas.

La santa vierja ven de me telefonar per me dire que bon, reclamar daus comentaris, 'quò es ben, mas faudriá benleu escrir de las chausas per los meritar. Segur, 'la as rason, adonc vei-la-quí ma composicion sus mon dissabde a París.

Prenguí lo tren d'abora dissabde mandin. Un de 'quilhs trens que per 'nar d'un punt l'autre se 'restan dins totas las pitas garas. Qu'eriá agradiu. I aguet pas de chaumassas sauvatgas 'gulhadas per los meschents bolchevics de la C.G.T. aürosadament. La meteò de la davalada dau tren eriá la mesma que quante pertisetem : cuberta sens pluèia mas emb un pitit vent freg.
D'en prumier anguí au Louvre per veire las òbras dau Titien, dau Tintoret e dau Veronèse, òbras amassadas dins de las tematicas divèrsas per mòstrar coma ilhs se son inspirats l'un-l'autres, complementats. I aviá de las fòrça bravas telas. De las pausar en faça l'una l'autra, de las vetz sus daus subjects pròpches, d'autras vetz sus la mesa en òrdre o segond l'epoca, 'quo es totjorns 'n'eidèia de las  bravas. Subretot per 'quilhs tres pintres qu'an participats au renovelament de la pintura dins l'usatge de l'òli sus tiala e la preferència de la color sus lo dessenh.
Personalament sei estat frapat per la modernitat de quauques portrachs ; qua'iment de la gent de tots los jorns. Sens obludar aquela frasa :

« N'autres los pintres, nos nos ballham la licència que se balhan los poètes e los fòus [...]. Se i a de l'espaci dins lo tableu, l'orne de tant de figuras que me iò damandan e segon mon imaginacion »

declaret Veronèse davant lo tribunau de l'Inquisicion en julhet 1573. La soá « eretgia » eriá d'aver pintrat au beu mitan d'una scena biblica daus sodarts sadolauds, daus pantres, daus bofons e autres personatges de Venisia. Sa vertat es la bona fe dins la libertat artistica.

Bon mon CM² es luenh auèi, adonc torne m'esmangonhar sus un ton mai personau.

'Neí me permenar dins lo Marais-París© afe, dins lo pretexte culturau d'aqueu luòc, autrament dich, la librariá los mòts-a-la-bocha, mesfiatz v'autres lo sit es desparrier de la botica. 'La es 'ribada 'na merda comerciala coma los autres endrechs dau Marais-París© :

t'ses gai + as de la moneda = 'Chapta per far creire ! 'Chapta per far jòune ! 'Chapta per bicar ! 'Chapta lo bonur !

I a enquera 'quauquas annadas, qu'eriá un plaser d'i 'nar farfolhar e 'chabar per tombar sus un chap d'òbra, tant per lo contengut que la faiçon dau contengut. Aura, metan d'en prumier los chauses comerciaus. Sem pas enquera 'ribats coma aquela de Barcelona mas ne'n sem pas luenh. Per imatgar mon perpaus :

Charchava un libreton « precís » d'un autor a la vetz :

gai, lemosin, catolic de dreita, reac ~~ catolic de dreite e lemosin ~~ reac e gai ~~ lemosin e reac ~~ catolic e gai

E òc, aquò eisista e comptatz pas sus me per balhar lo nom aquí, vole pas estre einuiat, embrenat per mas legidas, d'autant mai que 'queu tipe es fòrça conegut per un autre libre. Dins la librariá, i a los autres libres, los reacs, los « straight inside », mas « la triologia maudita », be non, l'an pas. I a de plenas tauladas de merda, de libres emplits de nòvelas tiradas de la tiala, mai d'una vetz 'quo es mauescrich, vulgar, emb daus fantasmes de jalinas justas prestas a traucar la ròta quante 'riba 'na veitura. Per ma pera, dins 'n'espeçaria especialisada sem en dreit d'esperar autra chausa que los produchs « identitaris a forta valor ajustada e a forta marja ».

Produch + arocana = bonur riclanisat ?

Voudriá pas passar per un pissa-freg e coma de companhia las auchas se banhan, ne'n ai legit quauques uns. Tant Dustan poviá se dire escrivan, tant per esemple las « enquestas dau Leo Pinipedes » devrian pas passar la casa « juòc de mòt per estanquet riclanisat».

Dau costat de la poèsia, justament, i a la novela antologia daus trobadors, bon sus 'na quarantena de tipe, pas 'na femna (de verifiar). Las trobaritz an pas jamai eisistadas benleu ? ? ? Veiquí un subject perque las feministas occitanas s'esmalissen un pauc. Sus los trobadors, fau legir « les troubadours » dau Henri-Irénée Marrou, un libre que fa lo torn de las questions (originas, legendas...).

Dins lo mesma esperit i a lo libre dau Louis-Georges Tin « l'invencion de la cultura eterosessuala », aquí dedins pas un tèxte de femnas, pas LO tèxte gai de la trobaritz Bieris de Romans, ben non, coma 'quò vai a l'encontra de mas nevròsas ortonormativas, ne'n parle pas ; ne'n mai d'aquò la mair es ben urosa de me preparar ma sopa, mancariá pus qu'ela escriva de la poèsia (Iò sabe, ai un problema personau coma 'queu tipe, mas 'ribe pas a tirar la chadena).

Per dire la vertat, me pensí un pauc coma 'queu coble, certa ridicul d'aver portat l'afar davant la justicia, mas dins lo Marais-París© atz interès de fialar coma 'quò fau, autrament setz vita regietat. Ne'n mai d'aquò d'aver ganhar en respectabilitat (depenalisacion, PACS, acceptabilitat...) rendet pas los gais jauvents (fort consomators d'anti-depressius, suicides, normativacion de la vita a dos...) e fuguet un dau pretèxte per revendicar la mediocrita coma « art de viure » ; e sei pas aprep dire que « qu'eriá mielhs avant ». Dins la videò liada a l'istòria dau coble, i a la festa, la festa, la festa coma eschampa, la festa per obludar, la festa per se creire enquera viu, coma iò disset l'autre : « la gay-pride un jorn 'quò vai, quante n'i a tots los jorns... »

Aprep, aní a la 'massada daus amics de la lenga d'òc e las amijas maitot, assiteí a la conferència, puis aní chas ma segonda librariá comunautarista perqué sei bi... minorisat :p dins laquala « lemosin » es pas un gròs mòt :

Librairie "Pam de Nas" - 30, rue des Grands Augustins - 75006 Paris

Telefòne / telecopior : 01 43 54 04 84

E m'entorní.

~~o[@¡@]o~~

Bon, pense qu'avetz entendu parlar d'aqueu afar de corièl mandat per lo regent au PFG :

« Désolé mais par rapport au nom de votre équipe et conformément aux principes de notre équipe, qui est une équipe de musulmans pratiquants, nous ne pouvons jouer contre vous, nos convictions sont de loin plus importantes qu'un simple match de foot, encore une fois excusez-nous de vous avoir prévenu si tard. »

Pense qu'avetz entendu parlar dau desboiradís mediatic (dau Figarò jusca 20 minutas) perque lo « lobby gay » es pertot :-) e benleu, auvit  la reaccion daus jugors :

« Une majorité de l’équipe est choquée, certes, que cette équipe puisse s’appeler Foot Gay... Mais on ne cautionne pas le mail de notre dirigeant. D’ailleurs, il ne nous a pas prévenus de l’envoi de ce courrier. Il a été dépassé par les événements » preciça Ben, lo capitani dau Creteil Bebèl.

« Il y a des membres qui sont musulmans, aucun n'est intégriste et certains ne sont pas musulmans. C'est juste une bande de potes qui ont décidé, pour leur loisir après le boulot, de jouer au foot. »

Quo es 'na banda de potes amassada per jugar. Fau rire !

Los sits :

• Lo PFG
• L'occitanista fotbabala's blog :-)
• Lo sit dau Senat ente se trobe la lei 1905 de separacion de la 'gleisa e daus medias de l'Estat.

~~~

Per me trufar dau responsable de GayLib  e sos islamistes de pertout, la prumièra scèna d'un grand film de marionetas.

E d'autres bocins :

Los tres ganhononets es un raconta dau XVIII segle : tres jòunes ganhons laisseten lurs mair per 'nar viure lur vita. Lo prumier se bastiguet 'na meijon de palha, lo segond de buesc, lo darnier iò faguet emb de la brica e dau mortier. 'Ribet un lop grand, fòrt, d'espanlas larjas e gròs minjor de ganhononets, un pauc coma tots los lops quante las goiatas portent una limosina roja son pertidas, d'en creire Finkencrosta, far benleu las correntinas.

Sabetz la seguida : lo lop se creu un pauc, quo es bon per la prumièra e la segonda meijon, se cassa lo nas sus la tresesma ; vòu passar per la cheminèia per lo malur de las soas fessas...

Tant qu'a bargassar sus los lops e los ganhons, m'es 'vís tanben que los perpaus dau Bayrou contre Cohn-Bendit a la television, lo biais de contar tot e n'importe que sus Polansky sens estre juge qualifiat, la gent que montran las dents contre lo Mitterrand sens aver legir 'na pagina de la Meschenta Vita (1), 'quilhs perpaus son dins lo fiu dau temps, coma aqueu de la vielha de Montauban.

'Tention, parle pas de ren dire e far ren faça aus pedofils o b'etot faça aus toristes sessuaus (2) ; defende degun aquí. Mas sei totjorn espaurit davant lo fenomena de fola, la manipulacion « per la bona causa », los amalgames coma gai=pedofil...

Ne vole pas parlar moralitat mas d'un pauc de justicia faça a l'ortonormalitat. Dise pas de pausar lo barrador mas de se cular un pauc, se cular perque boirar justicia e moralitat es lo sinhe que l'una e l'autra marchan gaire coma fau. Despuei que lo Nicolae esprimet la volontat de raiar l'eretatge de Mai 68, me vese dins 'na fòrma de retorn d'òrdre morau dins sa simplicitat nècia ; lu legisse dins los sondatges e dins los comentaris daus sits pobelas sus la tiala (e sus los sits « seriós »  coma l'Express, l'Obs...) lu legisse mai que mai sus los sitonets SMS coma lo Twitter ©.

140 sihnes per farjar un vejaire, la frontièra davant la lapidacion ?

Nòtas:
1/ Le Pen filha sembla contar de las conarias e subretot semble aver adjúnher « jòune »  davant « garçon ». Quauqu'un ven de me prestar lo libre per iò legir.
2/ Vau pas estre ben fin dins 'quela nòta sus lo torisme sessuau : totas las vetz ente me trobe dins 'na novela vila, un noveu país, sol, me sente oblijat de coijar coma un, quauquavetz dos o tres, tipe major qu'es 'quí a trainar l'envèia au morre. Me pense que 'quò ne'n es 'na fòrma...

I a un libre que conta l'istòria vertadièra d'un goiat apeiregar (linchar) au lendoman de la guerra de 1870. Fuguet tuat sus lo sòl dobte de simpatia per los prussians. Sus la fe d'una rumor tant bancala que meschenta, la fola lu massacret, l'esbocinet, le brutlet e quauquas « personas » 'neten jusca lu minjar. Lo paubre representava totas las frustacions d'un monde traït per una « elita ». 'Queu libre l'ai pas legit, l'ai solament auvit « cronicat » dins lo pòste.

Vonvonarai pas mai sus la tiala !

Doas istòrias daus grands lops e ganhononets

Lo film s'ubra sos 'na plujada, benleu d'un biais simbolica, las larmas daus dius, marchatz saber, e sus 'na porta qu'a dau mau per se dubrir, totjorn d'un biais simbolica, la porta de l'istòria de la familha.
Aaron es bochier e alaidonc qu'eu es trapat de ranjar los afars de son paubre pair, 'riba Ezri, l'angeu dau desrei, un jòune juste bon per desramar 'queu 'nivèr ben renjat.

Vau pas contar tota l'istòria d'aqueu canton integriste, inspirat de Mea Shearin. La gent filmats son dins « la crenhença daus dius » adonc s'inventan un fum de règlas per organisar lur pita vita, subretot per pas viure tròps de plasers. La persona es denegada, au profieit dau grop, e quante las règlas marchan pas, i a la miliça de la comunauta. Sens obludar l'ipocrisia interna per sauvegardar lo vernis esterior, pense 'quí au maridatge de la Sarah dins lo film, ela es tornada vierja, afè de iò dire.
Dau mesma biais, los dius, per la bocha dau rabbit, an farjats una espròva que lo Aaron manquet, laidonc ne'n fan 'n'autra que, perqué comprend mielhs las chausas, lo Ezri va i aidar per sauvar la comunautat. Los dius saben tot.

Paubres, paubres, paubres, aürosadament sei laïc, 'na saloperia de laïcard coma m'a traitat un tipe de Palestina45.

Per achabar, los liams :

• Lo sit dau distributor de « Einaym Pkuhot ~ Tu n'aimeras point »
• Sur rue89
• Einaym Pkuhot sus allocine
• Yossi and Jagger sus allocine
• Ha- The Bubble sus allocine
• Amos Gitaï sus « Kadosh »
• L'omessessualitat feminina dins « Les Secrets » per Avi Nesher

Dins la banda anonça, i a un bocin de « Lakmé » dau Léo Delibes, lo duò de las flors. Aquela scèna es mai d'una vetz interpretada coma lesbiena, esperava pas veire Aaron e Ezri dins l'aiga la tornar jugar, segur, mas, fòra un chause culturau per los francofònes, ai pas comprès perqué aquela musica. Dins lo film sem mai pròpches dau « Stabat Mater » dau Pergolesi.

LAKMÉ
Viens, Mallika, les lianes en fleurs
Jettent déjà leur ombre
Sur le ruisseau sacré qui coule, calme et sombre,
Eveillé par le chant des oiseaux tapageurs!

MALLIKA
Oh! maîtresse,
C’est l’heure ou je te vois sourire,
L’heure bénie où je puis lire
dans le cœur toujours fermé de Lakmé!

La seguida

Seriosament, l'istòria contada per la radiò me semblava un pauc 'na babòia : un comerciau entre dos rendez-vous marcha bicar los paísans pusleu que vendre daus 'peladors, aquò juscantau jorn ente eu sauva 'na goiata e tombe amorós...

Coma entau resumat, me penseí que lo film deviá estre 'na conaria de mai, mas fau saber se far violència, 'neí lu 'visar. Ebe, per lo darnier film d'avant la rentrat, ni mon temps ni ma moneda se trobeten a dire. Le film porta daus costats « Reichian » dins sa volontat de contredire l'eidèia que 'na vetz trobada la gent an qu'a restats a lur plaça. Mas en defòra daus perpaus de libertat, contre lo bon ordre borgès, i a tres biais gairement jamai parlats dins los comentaris legits d'aquí-d'alai :

1. son de la gent de la terra que parlan pas coma a París, an 'na puta d'accent, aqueu d'Albi, segur, de l'encontrada mai-que-segur. Ren que per aquó lo film es daus bons.
2. lu francés auvit es trufat d'occitanismes***. Sens obludar que mai d'unas discutidas son copiadas sus lo model economic dominant, mas mudadas dins un espaci de venta de tractors o b'etot sus 'n'istòria de mutacion dins lo Tarn & Garona, 'quò apulha sus lo perpaus que sem veraiament pas chas daus pedes dins « Le Marais-París© » o dins « plus belle la vie » mas alhors en França, dins aquela dau bas.
3. lo mai important per mon vejaire de chivalier-de-la-rampeta. Los còrs de la gent filmats son pas aqueus que podem pensar quante lu mòt « gai » es laschat. Son de la gent gròs, vielhs, usats que son fimats e non pas per se trufar, au contrari, per ne'n far una laus, enquera 'na vetz, la libertat contra las normas.

'Nava chabar queu bilhet sens parlar daus imatges emb de bravas colors e un cadratge sus los panoramàs coma dins los «sud-oest ern » e  subretot me fau parlar de « las doronhas ». Las doronhas son una especialitat dau cuenh, un boirradís entre lo Viagrà© e l'EPÒ©, 'na raiça ben conhada dins lo fond daus buescs...

• Veire lo sit desdiat !

Mai d'informacions sus 'queu film

La scèna se passet lo 1er de juilhet, a París quante i a 'gut lo lançament de la sason culturala de la Turquia per 'na durada de nòu mes. Quò eria la prumièra conferença de premsa per la novela dama pisson de la cultura de la França, lo Frederic Mitterand, e per l'ocasion, eria 'companha de son parier turc, Ertugrul Günay. La sale alenetava donc.
Un journaliste damandet çò qu'anava chamjar dins 'queu mesadís dins las relacions franco-turcas d'autemps mai que la França es l'un dau oposant a l'entrada de la Turquia dins l'Union Europeèna. Lo ministre francés diguet alòra :

Nòu mes, 'quò es lo temps necessari per una naissença.

Lo messatge era clar, nòu mes, aquò es long e balha dau temps per far trantolhar las eideias. Lo ministre turc opinhet e declaret laidonc :

Qu'i aia pas meprèsa, sem pas aprep far un pitit.

E lo Ertugrul Günay d'apondre, risent :

Sem entrats dins un processus que vai evoluar vers daus nouveus amors.

Lo Frederic diguet :

Crese que vau mielhs ne'n restar 'quí. Monsur lo ministre Günay coneis pas la miá reputacion !

La sala s'espeliguet dins un rire coma pas jamai e lo ministre turc maitot.

En França, un ministre pòt viure librament sas chausidas sessualas ; pòt mesma far de l'umor sus 'queu subject. Dins 'queu contèxte, pode pas far sens pensar a 'queu arbitre professionau (Halil Ibrahim Dinçdag) desvirat de sas fonccions perqué eria gai e que desempuei tascha de tornar trobar sos drechs. Lo ministre Ertugrul Günay me diguet aprep còp :

Segur aquí quo es la França. Aus USÀ, aquò se seria passat autrament.

Esperet l'endoman legir dins la premsa francésa aquela anecdòta. Los jornaus parleten mas de la conferença, sens jamai usar dau mot « gai », meteten la lum sus la chalor dau dialogue entra los dos ministres e escrigeten que los prejutjats sus la Turquia 'navan beleu tombar graça a 'questa sason de la Turquia ne'n França. E per las aganças de premsa turcas, 'las an tot suau obludat lo subje

De paur que - Diu nos garda ! - siá maucompres !

Mas, imaginatz 'na minuta que, en luòc de s'esclafar, nòstre ministre siàia restat quilhat drech coma un piquat o b'etot que s'esmaraude : la premsa francésa auriá migrat mai que mai. Ela auriá pas obludat de soslinhar que los oposants a l'entrada de la Turquia an benleu rason d'estre mesfiós. Dins la melhora possibilitat, los mediàs francés aurián tòst desparlar sus las dissemblanças grandas entras las doas culturas.

Funda Özkan per Radikal

~~O(°!°)O~~

• Lo sit dau jornau Radikal.
• L'article revirat ne'n francés sus CI (n°976 / 16-22 de julhet 2009).
• Lo sit de la sason culturala.

Nòta : ai botat los preterits d'aqueu bilhet « coma en charanta » e non pas « coma a Lemòtges », segur aquí quo es un vertadier desboiradís virtuau :p

[...] L'ipocricia es sanciera quand la França del nacional-egemonisme bonapartista franchimand vòl explicar a la Turquia quines son los camins democratics per respectar las minoritats e dintrar, aital, melhor dins l'Union Europèa... en respectar los tractats que França respecta pas. [...]

Abdurrahman Oztoprak