Un jorn t'i tornaràs far !

Condicions ecologicas daus trabalhors.
Dins "pòples retardats", una sola carta dessenhada per un inouit sufiguèt per enlusir sa pensada (ela es quitament justa). Reclus insistèt sus las coneissenças que deviàn aver los pòples prumiers per poder subreviure, o se autrament, eran condanats a mòrt. Eu faguèt 'na critica perquí daus regents, soles possessors de las cartas, adonc dau poder sus la gent per mielhs los domeschar.

Fenomenes economics.
Reclus faguèt dins queu libre, una francha critica de l'imperialisme de l'Euròpa (sem en 1900), mas de Marx maitot. Non pas que, per Reclus, lo Marx siguesse dins l'error, mas reduiguet son perpaus a la sola economia. Per Reclus, l'economia (e l'organisacion d'aquela 'quí) es 'na chausa, mas sens un punt de vuda generala, quo es pas utile (Reclus balha mesma son avis sus las prumieras fòrmas d'organisacions mutualisadas). Reclus condemnet las decisions centralisadas dins un país que deurián èsser presas "au mai pròpche possible" de las personnas concernadas.

Societat e Cultura dins un sense large.

Nòstra terra s'espandís tant luench que podem auvir la lenga.

Reclus analiset perquí, sens jamai èsser nacionaliste, las desparrieras dintra l'unitat alemanda e lo boticon frances d'aprep 1789. Eu balhet coma temuenh l'organisacion (en 1713) dins los Pirenèus dintra França e Espanha sens lo vejaire de París. Dins lo paragraf sus las culturas dau monde, quo es segur que fuguet defenduda l'eidèia que totas deurián estre respectadas. La cultura fuguet per los chinés (~1900) un util de resisténcia per 'nar contra las armas daus europeus, au contrari daus japonés ente i aviá 'gut 'na fòrma d'esblausidament davant l'arribada daus europeus. Sens obludar los anglés qu'an sauguts usar de las religions per bocinar e dominar las Indes.

Vau restar 'quí queu bilhet sus queu libre riche de las prumieras temptativas d'analisis politicas e geostrategicas, libre d'un bon legir. Ai pas l'edicion completa mas 'na presentacion realisada per Beatrice Giblin chas "La Découverte".