Un jorn t'i tornaràs far !

La pumièra scèna es un long chaminament tot lo long d'un obrador, mas se a la debuta quò sembla poder leu s'achabar, i a coma un punt-pivòt ente se disem que lo temps es long, que dins queu traveling i a un trucatge per esser partit d'una pita operacion d'aici a un bocin de quauquaren qua'iment pas identifiable, e quò dura.
E pueis, veiquí un plan dins la larjor per nos far comprendre que sem dins un sol endrech, que l'eternitat dau chaminament es en rapòrt emb lo gigantisme de l'atelier, un grand de chas grand, o b'etot un permis d'autres perqué quante sem defòra, lo luòc semble 'na pita vila bastida coma 'na caserna. Sem ne'n China, l'avetz compres.

'Queu prumier imatge balhet la basa dau trabalh dau Burtynsky, conegut per l'estudi de la rencontra dintra la geògrafia e los arts plasticas.

Coma far per balhar la nocion de l'espaci per de l'imatge ?
Lo tipe respond per l'usatge daus grands formats, daus cadratges coma per una mesa en scèna.

Mai d'una vetz, nos prenguet per lo bot dau nas sus un bocin d'imatge e, ne'n tres movaments, sem davant 'na montanha, 'na montanha de fer, de vielhs gatges, d'ordinators esbocinats, 'na montanha dins la nautor o au contrari daus potz profonds. Quauqu'uns son d'una beutat estraodinària, segur tirat dau trabalh d'espleitacion de l'òme sus la natura mas la color de nòstra fanja pòt esser d'una tela beauta. Quilhs cadratges nos fan compréner la diferença d'eschala dintra un uman e sas construcions, subretot quante son davant lo baratge de las tres gòrjas.

Ai pas 'na granda cultura fotografica, adonc pòde pas far de comparason emb los autres sus lo seu trabalh de la fotò (segur quò es pas lo Yan Arthus dau calendier). Lo film dins daus quauques traitaments fai pensar a Unser täglich Brot. Minimaliste dins lo parlar e beucòp d'imatge per pensar, se pausar de las questions sus la nocion de "profech", "creissança" o "progrès uman".

Vau pas far la leiçon, sei dins lo champ de mas criticas, malaurosadament, i sei, los dos pes dedins. Mesma queu bilhet participa a la destrucion de la terra. Lo tipe se'n cacha pas dins lo film, se pausa la question. Lu visem mesma se comportar coma "l'ocidentau de basa" qui paia 'na persona per prener la pausa sus la fotò...