Tarde un pauc emb ‘quela recepta de còrnuda, lo gateu daus Rampaums, mas ai ‘gut quauques problemas emb l’ordinator, l’organisacion de la jornada « grana e descreissença » (dins ‘n’autre bilhet ‘n’autra vetz), de las reunions a ne’n pus ‘chabar despuei quauques temps. Vise tanben (1)  que degun prenguet ma plaça per botar la recepta d’aqueu gateu especificament de la charanta lemosina, mas aquela partida eisista-t-ela despuei Tolosa, Marseilha o quitament de Bordeu ? Coma ‘na reserva de sauvatges meitat francés meitat pas grand chause, pas mai.

Bon, aura que me sei fach daus amics, bote ‘quí, doas receptas e de las fotografias. Me fau esser clar, la còrnuda es una briòcha, l’especificitat es la fòrma, un pau coma lu « Y ». Per la pita istòria, lu « Y » vendriá de l’evesque de Lemòtges, que per los Rampaums, suportava pus la fòrma un pauc sexuala dau gateu, adonc, ordonet un chamjament e ‘na fòrma mens falica : lu « Y ». La gent de Briguelh (2) an un autre ‘vis sus la question ; bon sei pas aprep escrire ‘na tesa, auretz qu’a segre los liams.

La pasta briòchada :

• 180 g de farina
• 180 g de crema
• 30 g de sucre
• 1 uòu
• 15 g de levadura chimica
• 1 pincada de sau

Dins una topina, fau boirar la farina, la levadura, la sau e la crema dins un prumier temps, puei l’uòu e lu sucre.
Dins un mòtle burrat que la fòrma es un « Y » (3), fau versar la pasta. Podetz dorar emb un uòu avant de far cueire 45 mn, termostat 5-6.

Dins ‘quela recepta, avetz pas gaire de possibilitats de far de las pitas còrnas  o las pitas banas per esser mai occitan, coma sus la fotò (una còrnuda d’un bolengier de Lemòtges).

Adonc, veiquí ‘na varianta :

• 400 g de farina
• 125 g de lach
• 60 g de burre
• 40 g de sucre
• 2 uòus
• 8 g de levadura dau bolengier aigada dins un veire.
• una pincada de sau

Dins un topin, fau boirar la sau, la farina, la levadura puei versar lu lach tèbie. Cassar los uòus avant de los gietar dedins lo topin emb lu burre esbocinat.
Fau pastonar un brave moment avant de la sucrar per tornar pastonar d’aici a aver ‘na pasta lissa.
Fau laissar pausar la pasta dau tempsde la veire doblar de voluma.

Aprep, podetz far los vòstres « Y », un gròs o dos / tres pitits, los dorar emb un uòu, puei cueire 45 mn, termostat 5-6.

Vole pas cachar ‘quí que la prumièra recepta es merdosa subretot se v’autres avetz pas lu bon mòtle, la seconda es pas aisada de tròp.

Vei-la-quí, la seconda, ratada 😦

Nòtas :

1. N’autres usam dau « tanben » maitot, de las vetz.
2. En Charanta, veire sus la carta.
3. Autrament setz bon per copilhar dau carton, li balhar ‘na fòrma de « Y » e l’aluminar.

Liams :

• La còrnuda filha
• La còrnuda garçon sus la ouiskipedia, lu bilhet consacrat a Chasluç
• Lo sit Chamboliva per las citacions istòricas