La jalada de pometas dau bargier Un jorn t'i tornaràs far !

La jalada de pometas dau bargier

'Quò es la sason de 'chabar d'emplir lo confiturier, alaidonc 'n'avantura de mai per vòstre chaçorculhor bloguidor.

Fau massar las fruchas d'espina blancha, pitas bolas rojas 'peladas « poires à bon dieu » en francés, « pometas dau bargier » en occitan. Mesfiatz v'autres, i a un òs sos la peu. Aprep las aver 'massadas, fau las desgrapilhar, las escoatar avant de las far bonhar 'n'ora dins un demiei litre d'aiga freda e 'na culhera de vinagre (blanc o de citre, o sabe-iò qué me).
L'ora escolada, fau gietar l'aiga e gardar las fruchas ;-) per las botar dins una cassairòla emb un autre demiei litre d'aiga. Far chaufar dietz minutas. Aquí, i a doas faiçons per ostar los nogeus :

passar las fruchas e lo jus dins un molin a legums. 'Quò es pas aisat, segur, e fau i far dos o tres vetz per aver beucòp de « pulpa ».
far un colador emb 'na pelha, puèis passar las fruchas. 'Quò es mai autentica, segur, mas pas 'cepte dau tot.

Fau pesar la pulpa e botar qua'iment lo mesma pes de sucre (personalament 0,5 Kg de sucre per ~1 Kg de frucha, mas i a de la gent que montan jusca 1 Kg per 1 Kg, la resulta es 'na confitura mai espessa), adjúnher un jus de citron (verd per mon peiron) e tornar la cassairòla sus lo fuòc, 30 minutas, fuòc doç. Vos fau escumar.
Dins un veire, botar 4 g. d'agar-agar e lo descalhar emb un pauc d'aiga ('tention, lo agar-agar sent pas la ròsa), gietar 'quela preparation dins la cassairòla e far cueire 2 minutas de mai tot en boirent.

Tuar lo fuòc e metre la jalada dins los topinots, barrar fòrça-fòrçada e cuar los pòts. Los laissar virats dau temps que fregissan.

Preparar las etiquetas per las jaspir.